Dráp Niflunga.

Gvnnarr oc Ha/gni toco þa gvllit alt, Fafniss arf. Ofriþr var þa i milli Givcunga oc Atla; kendi hann Givkvngom vold vm andlat Brynhildar. Þat var til setta, at þeir scyldo gipta hanom Gvðrvno, oc gafo henne ominnisveíg at drecca, aþr hon iatti at giptaz Atla. Synir Atla voro þeir Erpr oc Eitill; enn Svanhildr var Sigvrþar dottir oc Gvðrvnar. Atli konvngr ba/þ heim Gvnnari oc Ha/gna oc sendi Vinga eþa Knefra/þ. Gvðrvn vissi velar oc sendi meþ rvnom orð, at þeir scyldo eigi koma, oc til iartegna sendi hon Ha/gna hringinn Andvaraná/t oc knytti i vargshár. Gvnnarr hafþi bedit Oddrvnar systvr Atla oc gat eigi; þa fecc hann Gla/mvarar, enn Ha/gni atti Kostbero; þeirra synir váro þeir Solarr oc Snevarr oc Givki. Enn er Givkvngar komo til Atla, þa baþ Gvðrvn sono sina, at þeir boði Givkvngom lifs; enn þeir vildo eigi. Hiarta var scorit or Ha/gna, enn Gvnnarr settr i ormgarð. Hann slo horpo oc svefþi ormana, en nadra stacc hann til lifrar.