Gudrunarhvöt
Gvðrvn gecc þa til sevar, er hon hafði drepit Atla; gecc hon vt a seinn oc vildi fara ser; hon mátti eigi sa/cqva. Rac hana yfir fiordinn a land Ionacrs konvngs; hann fecc hennar; þeirra synir voro þeir Sa/rli oc Erpr oc Hamþir. Þar foddiz vpp Svanhildr Sigvrdar dottir; hon var gipt Iormvnreck enom rikia. Með hanom var Bicci; hann reþ þat, at Randvér konvngs son scyldi taca hana . . . . . . .  Þat sagði Bicci konvngi. Konvngr let hengia Randvé, enn troþa Svanhildi vndir hrossa fótom. Enn er þat spvrþi Gvðrvn, þa qvaddi hon sono sina.
1 5	Þa fra ec senno sliþrfengligsta, tra/þ mál talid af trega storvm, er harþhvgvþ hvatti at vigi grimmom orþom Gvdrvn sono:
2 5 9	«Hvi sitit, hvi sofit lífi, hvi tregraþ ycr teiti at mela? er Iormvnrecr ydra systor vnga at aldri ióm of traddi, hvitom oc svortom a hervegi, grám, gangta/mom Gotna hrossom.
3 5 9	Vrþva iþ glikir þeim Gvnnari, ne in heldr hvgðir sem var Ha/gni; hennar mvndoþ iþ hefna leita, ef iþ móþ ettiþ minna brodra eþa harþan hvg Hvnkonvnga.»
4 3 7	Þa qvaþ þat Hamþir inn hvgomstóri: «Lítt mvndir þv leyfa daþ Ha/gna, þa er Sigvrð vocþo svefni ór; becr váro þinar enar bláhvíto roþnar i vers dreyra, folgnar i valbloþi.
5 5	Vrþo þer  . . . . broþra hefndir sliþrar oc sárar, er þv sono myrþir; knettim [allir] Iormvnrecki samhyggiendr systor hefna.
6	Beriþ hnossir fram hvnkonvnga! hefir þv ocr hvatta at hiorþingi.»
7 5	Hleiandi Gvdrvn hvarf til scemmo, kvmbl konvnga or kerom valþi, siþar brynior, oc sonom ferþi; hloþvz modgir a mara bógo.
8 3 7	Þa qvaþ þat Hamþir inn hvgomstori: «Sva comaz meírr aptr moþvr at vitia geirniorþr hniginn á Goðþioþo, at þv erfi at oll oss dryckir, at Svanhildi oc sono þina.»
9 5	Gvþrvn gratandi, Givca dottir, gecc hon tregliga a tai sitia oc at telia tárokhlýra moþvg spioll a margan veg:
10 5	«Þriá vissa ec elda, þriá vissa ec arna, var ec þrimr verom vegin at hvsi; einn var mer Sigvrþr a/llom betri, er broþr minir at bana vrþo.
11 5	Svarra sara sakaþ ec ne kvnna, meirr þottvz mer vm stríþa, er mic a/þlingar Atla gafo.
12 3	Hvna hvassa het ec mer at rvnom, mattigac bolva betr vm vinna, aþr ec hnóf hofvþ af Niflvngom.
13 5	Gecc ec til strandar, gra/m varc nornom, vilda ec hrinda † stríþgriþ þeirra; hófo mic, ne drecþo, havar baror, þvi ec land vm stéc, at lifa scyldac.
14 5	Gecc ec a beþ, hvgdac mer fyr betra, þriþia sinni þioðkonvngi; ól ec mer ioþ, erfivorþo, [erfivorþo] Ionacrs sonom.
15 5	Enn vm Svanhildi sato þýiar, enn ec minna barna bazt fvllhvgðac; sva var Svanhildr i sal minom, sem veri semleitr solar geisli.
16 5 9	Gødda ec gvlli oc gvðvefiom, aþr ec gefac Goðþioðar til; þat er mer hardaz harma minna of þann inn hvíta hadd Svanhildar, avri troddo vnd ióa fótom.
17 5 9	Enn sa sarastr, er þeir Sigvrþ minn sigri rontan i soing vágo; enn sa grimmastr, er þeir Gvnnari fránir ormar til fiors scriþo; enn sa hvassastr, er til hiarta konvng obla/þan qvicvan scáro.
18 3 7	Fiolþ man ec ba/lva, [fiolþ man ec harma]; beittv, Sigvrþr! enn blacca mar, hest inn hraþfora lattv hinig renna! sitr eigi her snor ne dottir, sv er Gvdrvno gefi hnossir.
19 5	Minnztv, Sigvrþr! hvat viþ meltom, þa er viþ a beþ boþi satom, at þv myndir min, moþvgr! vitia halr or helio, enn ec þín or heime.
20 5	Hlaþit er, iarlar! eikica/stinn, latiþ þann vnd hilmi hestan verþa! megi brenna briost ba/lvafvlt eldr, [þrvngit] vm hiarta þiþni sorgir.»
21 5	Iorlom ollom oþal batni, snotom ollom sorg at minni, at þetta tregrof vm taliþ veri.