Guðrúnarkviða hin forna.
Þioþrecr konungr var meþ Atla oc hafði þar latiþ flesta alla menn sina. Þioþrecr oc Gvdrvn korþo harma sin a milli; hon sagði hanom oc qvad:
1 5	Mer var ec meyia, moþir mic foddi, biort i bvri, vnna ec vel broþrom: vnz mic Givci gvlli reifþi, gvlli reifþi, gaf Sigvrþi.
2 5	Sva var Sigvrþr vf sonom Givca, sem veri gronn la/cr or grasi vaxinn eþa hiortr habeinn vm hvossom dýrom eþa gvll gloðrá/t af gra silfri.
3 5	Vnnz mer fyrmvnþo minir broþr, at ec etta ver a/llom fremra; sofa þeir ne mattvþ ne of sakar doma, aþr þeir Sigvrþ svelta leto.
4 5	Grani rann at þingi, gnyr var at heyra, enn þa Sigvrþr sialfr eigi com; a/ll váro sa/þvldyr sveita stockin oc of vaniþ vási vnd vegondom.
5 5	Gecc ec gratandi viþ Grana roþa, urvghlyra ió fra ec spialla; hnipnaþi Grani þa, drap i gras ha/fþi: ior þat vissi, eigendr ne lifþvt.
6	Lengi hvarfaþac, lengi hvgir deildoz, aþr ec of fregac folcvorþ at gram.
7 5	Hnipnaþi Gvnnarr, sagði mer Ha/gni fra Sigvrþar sárom da/þa: «Liggr of hoggvinn fyr handan ver Gothorms bani of gefinn vlfom.
8 5	Littv þar Sigvrþ a svþrvega! þa heyrir þv hrafna gialla, orno gialla ezli fegna, varga þiota vm veri þinom.»
9 5	«Hvi þv mer, Ha/gni! harma slica viliala/ssi vill vm segia? þít scyli hiarta hrafnar slita viþ lond yfir, enn þv vitir manna.»
10 5	Svaraþi Ha/gni sinni eino tra/þr góds hvgar af trega storvm: «Þess attv, Gudrvn! groti at fleiri, at hiarta mitt hrafnar slíti.»
11 5 9	Hvarf ec ein þaðan annspilli fra a uiþ lesa varga leífar; gerþiga ec hiúfra ne hondom slá ne qveina vm sem konor aþrar, þa er sat soltin vm Sigvrþi.
12 5 9	Nott þótti mer niþmyrcr vera, er ec sarla satc yfir Sigvrþi; ulfar þottvmz ollo betri, ef þeir leti mic lífi tyna, eþa brenndi mic sem birkinn viþ.
13	For ec af fialli fimm dogr taliþ, vnnz ec holl Halfs hava þecþac.
14 5	Sat ec meþ Þóro sia/ misseri dotr Haconar i Danmorco; hon mer at gamni gvllbókaþi sali svdrona oc svani dansca.
15 5	Ha/fðo við a scriptom þat er scatar leko oc a hannyrðom hilmis þegna, randir ra/ðar, recka Hvna, hiordrot, hialmdrótt, hilmis fylgio.
16 5	Scip Sigmvndar, scriþo fra landi, gyltar grimor, grafnir stafnar; byrþo viþ a borða þat er þeir borðvz Sigarr oc Siggeirr svþr a Fivi.
17 5 9	Þa fra Grimildr gotnesc kona, hvat ec vera hyggioþ   .   .   .   ; hon brá borþa oc bvri heimti þrágiarnliga þess at spyria: hverr vildi son systvr bota eþa ver veginn vildi gialda.
18 5 9	Gerr lez Gvnnarr gvll at bioþa sacar at bota, oc iþ sama Ha/gni; hon fretti at þvi, hverr fara uildi vigg at sa/þla vagn at beita, hesti riþa, ha/ki fleygia, a/rom at sciota af yboga.
19 5 9	Valdarr Da/nom meþ Iarizleifi, Eymoþr þriþi meþ Iarizscári inn gengo þa iofrom likir; Langbarz liþar, hofþo loþa ra/þa, stvttar brynior, steypta hialma, scalmom gyrþir, ha/fðo scarar iarpar.
20 5	Hverr vildi mer hnossir velia, hnossir velia oc hvgat mela, ef þeir metti mer margra svta trygdir vinna, ne ec trva gerða.
21 5	Forði mer Grimildr fvll at drecka svalt oc sarlict, ne ec sacar mvnþac; þat var vm a/kit iarþar magni, svalca/ldom se oc sonar dreyra.
22 5	Voro i horni hverskyns stafir ristnir oc roþnir, raþa ec ne mattac; lyngfiscr langr, landz Haddingia ax oscorit, innleiþ dyra.
23 5	Voro þeim biori ba/l morg saman, vrt allz viþar oc akarn brvnnin, vmda/gg arins, iþrar blotnar, svins lifr soþin, þviat hon sacar deyfþi.
24 5	Enn þa gleymþv, er getiþ ha/fþo, a/ll iofvrs † ior bivg i sal; qvomo konvngar fyr kne þrennir, aþr hon sialfa mic sotti at mali.
25 5	Grimildr qvaþ: «Gef ec þer, Gvðrvn! gvll at þiggia, fiolþ allz fiár at þinn fa/þvr da/þan; hringa ra/ða, Hla/þvés sali, arsal allan at iofvr fallinn.
26 5	Hvnscar meyiar, þer er hlaþa spioldom oc gora gvll fagrt, sva at þer gaman þicki; eín scaltv raþa a/þi Bvðla gvlli ga/fgvð oc gefin Atla.»
27 5	«Vilc eigi ec meþ veri ganga ne Brynhildar brodvr eiga; samir eigi mer viþ son Bvdla ett at a/ca ne vna lifi.»
28 5	Grimildr qvaþ: «Hirþaþv ha/lldom heiptir gialda, þviat ver hofom valdit fyrri; sva scaltv lata, sem þeir lifi baþir Sigvrþr oc Sigmvndr, ef þv sono foþir.»
29 5	«Maca ec, Grimildr! gla/mi bella ne uigrisins vanir telia, siz Sigvrþar sárla drvcco hregifr, hvginn hiartbloþ saman.»
30 5	Grimildr qvaþ: «Þann hefi ec allra etga/fgastan fylci fvndit oc framarst necqvi; hann scaltv eiga, vnz þic alþr viþr, verla/s vera, nema þv vilir þenna.»
31 5 9	«Hirþaþv bióþa ba/lvafvllar þrágiarnliga þer kindir mer! hann mvn Gvnnar grandi beita oc or Haugna hiarta slita. Muncaþ ec letta, aþr lifshvatan eggleics hvotuð aldri nemic.»
32 3	Gratandi Grimildr greip vid ordi, er bvrom sinom ba/lva uetti oc ma/gom sinom meína stórra.
33 5	Grimildr qvaþ: «Lond gef ec enn þer, lyda sinni, Uinbiorg, Ualbiorg, ef þv uill þiggia; eigdv vm aldr þat oc uni, dottir!»
34 5	«Þann mvn ec kiósa af konvngom oc þo af niþiom na/þig hafa; verþr eigi mer verr at ynþi ne ba/l broþra at bvra scioli.»
35 5 9	Senn var a hesti hverr drengr litinn, enn uíf ualnesc hafit i vagna; ver sia/ daga svalt land riþom, enn aþra sia/ vnnir kniþom, enn ina þriþio sia/ þvrt land sigom.
36	Þar hliþverþir harar borgar grind vpp lvco, aþr i garþ riþom.
37	Vacþi mic Atli, enn ec vera þottvmz fvll illz hvgar at frondr da/þa.
38 5	Atli qvaþ: «Sva mic nyliga nornir vekia:» — uilsinnis spá uildi at ec reþa — «hvgða ec þic, Gvdrvn Givca dottir! leblondnom hior leggia mic í gognom.»
39 5	«Þat er fyr eldi, er iarn dreýma, fyr dvl oc vil drosar reiþi; mvn ec þic viþ bolvi brenna ganga, licna oc lecna, þot mer leíþr sér.»
40 5	Atli qvaþ: «Hvgða ec her i tvni teína fallna, þa er ec vildigac vaxna lata; rifnir meþ rótom, roþnir i bloþi, bornir a becci, beþit mic at tyggva.
41 5	Hugða ec mer af hendi ha/ca flivga bráþala/sa ba/lranna til; hiorto hvgda ec þeirra uiþ hunang tvggin, sorgmoþs sefa, sollin bloþi.
42 5	Hvgda ec mer af hendi hvelpa losna, gla/ms andvana gylli baþir; hold hvgda ec þeirra at hrovm orþit, na/þigr ná nyta ec scyldac.»
43 5	«Þar mvno seggir vm sefing doma oc hvitinga ha/fþi nema; þeir mvno feigir fára nátta fyr dag litlo, drottom bergia.»
44	Atli qvaþ: «Lega ec siþan, ne ec sofa uildac, þrágiarn i ka/r; þat man ec gorva.»