Sigurðarkviða Fáfnisbana hin fyrsta eða Gripisspá
Gripir het son Eylima, broþir Hiordisar; hann reþ londom oc var allra manna vitrastr oc framvíss. Sigvrþr reið einn saman oc com til hallar Gripiss. Sigvrþr var a/þkendr; hann hitti mann at mali vti fyr ha/llinni, sa nefndiz Geitir; þa qvaddi Sigvrþr hann mals oc spyrr:
1 5	«Hverr byggir her borgir þessar, hvat þann þioþkonvng þegnar nefna?» Geitir qvaþ: «Gripir heitir gvmna stióri, sa er fastri reþr foldo oc þegnom.»
2 5	Sigvrþr qvaþ: «Er horscr konvngr heima i landi, mvn sa gramr viþ mic ganga at mela? mals er þarfi maþr okvnnigr, vil ec fliotliga finna Gripi.»
3 5	Geitir qvaþ: «Þess mvn glaðr konvngr Geiti spyria, hverr sa maþr se, er mals qveþr Gripi.» Sigvrþr qvaþ: «Sigvrþr ec heiti, borinn Sigmvndi, enn Hiordís er hilmis moþir.»
4 5	Þa gecc Geitir Gripi at segia: «Her er maþr vti okvþr kominn, hann er itarligr at aliti, sa vill, fylcir! fvnd þinn hafa.»
5 5	Gengr or scala scatna drottinn oc heilsar vel hilmi comnom: «Þiggþv her, Sigvrþr! veri somra fyrr, enn þv, Geitir! tac viþ Grana sialfom.»
6 5	Mela namo oc mart hiala, þa er raþspacir reccar fvndvz. Sigvrþr qvaþ: «Segdv mer, ef þv veizt, moþvrbroþir! hve mvn Sigvrþi snvna efi?»
7 5	Gripir qvaþ: «Þv mvnt maþr vera moztr vnd solo oc hestr borinn hveriom iofri, giofvll af gvlli, enn gleyggr flvgar, itr aliti oc i orþom spacr.»
8 5	Sigvrþr qvaþ: «Segðv, gegn konvngr! gerr, enn ec spvria, snotr, Sigvrþi, ef þv sia þicciz: hvat mvn fyrst goraz til farnaðar, þa er or garþi emc genginn þinom?»
9 5	Gripir qvaþ: «Fyrst mvntv, fylcir! fa/dvr vm hefna oc Eylima allz harms reca; þv mvnt harþa Hvndings sono snialla fella, mvndv sigr hafa.»
10 5	Sigvrþr qvaþ: «Segþv, itr konvngr, ettingi! mer heldr horscliga, er viþ hvgat melom: sér þv Sigvrþar snor bra/gð fyr, þa/ er hest fara vnd himinsca/tom?»
11 5	Gripir qvaþ: «Mvndv einn vega orm inn frána, þann er graðvgr liggr a Gnitaheiði; þv mvnt baðom at bana verþa Regin oc Fafni, rett segir Gripir.»
12 5	Sigvrþr qvaþ: «Avþr mvn orinn, ef ec eflic sva víg meþ virþom, sem þv vist segir; leiþ at hvga oc lengi seg: hvat mvn enn vera efi minnar?»
13 5	Gripir qvaþ: «Þv mvnt finna Fafnis boli oc vp taca a/þ inn fagra, gvlli hleþa a Grana bógo, riþr þv til Givca, gramr vigrisinn!»
14 5	Sigvrþr qvaþ: «Enn scaltv hilmi i hvgazroþo, framlyndr iofvrr! fleira segia: gestr em ec Givca oc ec geng þaðan, hvat mvn enn vera efi minnar?»
15 5	Gripir qvaþ: «Sefr a fialli fylcis dottir biort i brynio eptir bana Helga; þv mvnt ha/ggva hvosso sverþi, brynio rista meþ bana Fafnis.»
16 5	Sigvrþr qvaþ: «Brotin er brynia, brvþr mela tecr, er vacnaþi víf or svefni; hvat mvn snot at heldr viþ Sigvrþ mela, þat er at farnaþi fylci verþi?»
17 5	Gripir qvaþ: «Hon mvn rikiom þer rvnar kenna allar þer er aldir eignaz vildo, oc a mannz tvngo mela hveria, lyf meþ lecning; lifþv heill, konvngr!»
18 5	Sigvrþr qvaþ: «Nv er þvi locit, nvmin ero froþi, oc em brá/t þaðan bvinn at riþa; leið at hvga oc lengra seg: hvat mvn meirr vera minnar efi?»
19 5	Gripir qvaþ: «Þv mvnt hitta Heimis bygdir oc glaþr vera gestr þioþkonvngs; fariþ er, Sigvrþr! þatz ec fyr vissac, scala fremr enn sva fregna Gripi.»
20 5	Sigvrþr qvaþ: «Nv for mer ecca orþ þatztv meltir, þviat þv fram vm ser, fylkir! lengra; veiztv ofmicit angr Sigvrþi, þvi þv, Gripir! þat gerra segia.»
21 5	Gripir qvaþ: «Lá mer vm osco efi þinnar liosast fyr lita eptir; rett em ec raþspacr taliþr ne in heldr framvíss, farit þatz ec vissac.»
22 5	Sigvrþr qvaþ: «Mann veit ec engi fyr mold ofan, þann er fleira se fram enn þv, Gripir! scalatv leyna, þott liót sé eþa mein goriz a minom hag.»
23 5	Gripir qvaþ: «Era meþ la/stom la/gð efi þer, lattv, inn itri, þat, a/þlingr! nemaz; þviat vppi mvn, meþan a/ld lifir, naddels boþi! nafn þitt vera.»
24 5	Sigvrþr qvaþ: «Verst hyggiom þvi, verþr at sciliaz Sigvrþr viþ fylci at sogoro; leiþ visaþv — lagt er alt fyr — morr, mer, ef þv vilt, moþvrbroþir!»
25 5	Gripir qvaþ: «Nv scal Sigvrþi segia gerva, allz þengill mic til þess neydir; mvndo vist vita, at vetki lygr: dogr eitt er þer da/þi etlaþr.»
26 5	Sigvrþr qvaþ: «Vilcat ec reiþi rics þioþkonvngs, goð raþ at heldr Gripiss þiggia; nv vill vist vita, þott viltki se, hvat a synt Sigvrþr ser fyr hondvm.»
27 5	Gripir qvaþ: «Flioþ er at Heimis fagrt alitom, hana Brynhildi bragnar nefna, dottir Bvdla, enn dyrr konvngr harþvgðict man Heimir foðir.»
28 5	Sigvrþr qvaþ: «Hvat er mic at þvi, þott mer se fogr aliti fodd at Heimiss? þat scaltv, Gripir! gorva segia, þviat þv a/ll vm ser orlog fyr.»
29 5	Gripir qvaþ: «Hon firrir þic flesto gamni, fa/gr aliti fostra Heimis; svefn þv ne sefr, ne vm sacar domir, gáraþv manna, nema þv mey ser.»
30 5	Sigvrþr qvaþ: «Hvat mvn til licna lagt Sigvrði? segdv, Gripir! þat, ef þv sia þicciz; mvn ec mey ná mvndi ca/pa, þa ina fa/gro fylciss dottvr?»
31 5	Gripir qvaþ: «Iþ mvnvþ alla eiþa vinna fvllfastliga, fá mvnvþ halda; veriþ hefir þv Givca gestr eina nott, mantattv horsca Heimis fostro.»
32 5	Sigvrþr qvaþ: «Hvat er þa, Gripir! get þv þess fyr mer, ser þv geþleysi i grams scapi, er ec scal viþ mey þa malom slíta, er ec allz hvgar vnna þottomc?»
33 5	Gripir qvaþ: «Þv verþr, siclingr! fyr svicom annars, mvndo Grimhildar gialda raþa; mvn bioþa þer biarthaddaþ man dottvr sina, dregr hon vel at gram.»
34 5	Sigvrþr qvaþ: «Mvn ec við þa Gvnnar gorva hleýti oc Gvðrvno ganga at eiga; fvllkveni þa fylkir vori, ef meintregar mer angradit.»
35 5	Gripir qvaþ: «Þic mvn Grimhildr gorva véla, mvn hon Brynhildar biþia fýsa Gvnnari til handa Gotna drotni, heitr þv fiotliga for fylcis modvr.»
36 5	Sigvrþr qvaþ: «Meín ero fyr hondom, ma ec lita þat, ratar gorliga raþ Sigvrdar, ef ec scal morrar meyiar biþia oðrom til handa, þeirrar ec vnna vel.»
37 5	Gripir qvaþ: «Er mvnvþ allir eiþa vinna Gvnnarr oc Ha/gni, enn þv, gramr! þriþi; þa it litom vixlit, er a leiþ eroþ, Gvnnarr oc þv, Gripir lygr eigi.»
38 5	Sigvrþr qvaþ: «Hvi gegnir þat? hvi scolom scipta litom oc latom, er a leiþ erom? þar mvn flaroþi fylgia annat atalt meþ a/llo; enn segþv, Gripir!»
39 5	Gripir qvaþ: «Lit hefir þv Gvnnars oc leti hans, melsco þina oc meginhyggior; mvndv fastna þer framlvndaþa fostro Heimiss, sér vetr fyr þvi.»
40 5	Sigvrþr qvaþ: «Verst hyggiom þvi, vandr mvnc heitinn Sigvrþr meþ seggiom at sogoro; vilda ec eigi velom beita iofra brvþi, er ec ozta ueitc.»
41 5	Gripir qvaþ: «Þv mvnt hvila, hers oddviti merr! hia meyio, sem þin moþir se; þvi mvn vppi, meþan a/ld lifir, þioþar þengill! þitt nafn vera.»
42 5	Sigvrþr qvaþ: «Mvn goða qvan Gvnnarr eiga merr meþ monnom, — mer segðv, Gripir! — þoat hafi þriar netr þegns brvþr hia mer snarlynd sofit? slics eroþ domi.»
43 5	Gripir qvaþ: «Saman mvno brvlla/p bodi drvccin Sigvrþar oc Gvnnars i sa/lom Givca; þa ha/mom vixlit, er it heim comit, hefir hverr fyr þvi hyggio sina.»
44 5	Sigvrþr qvaþ: «Hve mvn at ynþi eptir verþa megð meþ monnom? mer segðv, Gripir! mvn Gvnnari til gamans raþit siþan verþa eþa sialfom mer?»
45 5	Gripir qvaþ: «Minnir þic eiþa, máttv þegia þo, antv Gvdrvno godra raþa; enn Brynhildr þicciz brvþr vargefin, snót fiþr vélar ser at hefndom.»
46 5	Sigvrþr qvaþ: «Hvat mvn at botom brvþr sv taca, er velar ver vifi gerþom? hefir snot af mer svarna eiþa, enga efnda, enn vnat litit.»
47 5	Gripir qvaþ: «Mvn hon Gvnnari gorva segia, at þv eigi vel eiþom þyrmþir, þa er itr konvngr af a/llom hvg Givca arfi a gram trvþi.»
48 5	Sigvrþr qvaþ: «Hvat er þa, Gripir! getþv þess fyr mer, mvn ec saþr vera at sa/go þeirri, eþa lygr a mic lofsel kona oc a sialfa sic? segðv, Gripir! þat.»
49 5	Gripir qvaþ: «Mvn fyr reiði ríc brvdr vid þic ne af oftrega allvel scipa; viþr þv godri grand aldregi, þo er vif konvngs velom beittvð.»
50 5	Sigvrþr qvaþ: «Mvn horscr Gvnnarr at hvoton hennar Gvthormr oc Ha/gni ganga siþan? mvno synir Givca a sifivgi mer eggiar rioþa? enn segdv, Gripir!»
51 5	Gripir qvaþ: «Þa er Gvdrvno grimt vm hiarta, broþr hennar þer til bana raða, oc at ongo verþr yndi siþan vitro vifi; veldr þvi Grimilldr.
52 5	Þvi scal hvgga þic, hers odviti! sv mvn gipt lagit a grams evi: mvnat metri maþr a mold koma vnd solar siot, enn þv, Sigvrþr! þiccir.»
53 5	Sigvrþr qvaþ: «Sciliomc heilir! mvnat sca/pom vinna, nv hefir þv, Gripir! vel gort, sem ec beiddac; fliot myndir þv friþri segia mina evi, ef þv mettir þat.»