Alvíssmál
1 4	Alvíss qvaþ: «Becki breiþa, nv scal brvþr meþ mer heim i sinni snvaz; hrataþ vm mégi mvn hveriom þiccia, heima scalat hvíld nema.»
2 4	Þórr qvaþ: «Hvat er þat fira? hví ertv sva fa/lr vm nasar? vartv i nótt meþ ná? þvrsa líci þicci mer a þer vera; ertattv til brvþar borinn.»
3 4	Alvíss qvaþ: «Alvíss ec heiti, by ec fyr iorþ neþan, a ec vndir steini staþ; vagna vers ec em a vit kominn; bregði engi fa/sto heiti fira!»
4 4	Þórr qvaþ: «Ec mvn bregda, þviat ec brvþar a flest vm ráþ sem faþir; varca ec heima, þa er þer heitiþ var, at sa einn er † gia/fer meþ godom.»
5 4	Alvíss qvaþ: «Hvat er þat recca, er i raþom telz flioþs ens fagrgloa? fiarrafleina þic mvno fair kvnna; hverr hefir þic ba/gom borit?»
6 4	Þórr qvaþ: «Vingþórr ec heiti, ec hefi viþa rataþ, sonr em ec Siþgrana; at osatt minni scalattv þat iþ vnga man hafa oc þat giaforþ geta.»
7 4	Alvíss qvaþ: «Sattir þinar er ec vil snemma hafa oc þat giaforþ geta; eiga vilia heldr enn án vera þat iþ miallhvita man.»
8 4	Þórr qvaþ: «Meyiar astom mvna þer verþa, visi gestr! of variþ, ef þv or heimi kant hveriom at segia alt þat er ec vil vita.
9 4	Segðv mer þat, Alvíss! oll of ra/c fira voromc, dvergr! at vitir: hve sv iorþ heitir, er liggr fyr alda sonom, heimi hveriom i?»
10 4	Alvíss qvaþ: «Iorþ heitir meþ monnom, en meþ asom fold, calla vega vanir, igron iotnar, alfar groandi, kalla á/r vpregin.»
11 4	Þórr qvaþ: «Segdv mer þat, Alvíss! oll of ra/c fira, voromc, dvergr! at vitir: hve sa himinn heitir, † erakendi, heimi hveriom i?»
12 4	Alvíss qvaþ: «Himinn heitir meþ monnom, en hlyrnir meþ godom, kalla vindofni vanir, vppheim iotnar, alfar fagra refr, dvergar drivpan sal.»
13 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hverso máni heitir, sa er menn sia, heimi hveriom i?»
14 4	Alvíss qvaþ: «Mani heitir meþ monnom, en mylinn meþ godom, kalla hverfanda hvel helio i, scyndi iotnar, en scin dvergar, kalla alfar artala.»
15 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve sv sol heitir, er sia alda synir, heimi hveriom i?»
16 4	Alvíss qvaþ: «Sol heitir meþ monnom, enn svnna meþ goþom, kalla dvergar Dvalins leica, eyglo iotnar, alfar fagra hvel, alscír asa synir.»
17 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve þa/ scy heita, er scvrom blandaz, heimi hveriom i?
18 4	Alvíss qvaþ: «Scy heitir meþ monnom, enn scvrvan meþ goðom, kalla vindflot vanir, vrván iotnar, alfar veþrmegin, kalla i helio hialm hvliz.»
19 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve sa vindr heitir, er viðast ferr, heimi hveriom i?»
20 4	Alvíss qvaþ: «Vindr heitir meþ monnom, enn vávoþr meþ goðom, kalla gneggioþ ginnregin, opi ia/tnar, alfar dynfara, kalla i helio hviþvþ.»
21 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve þat logn heitir, er liggia scal, heimi hveriom i?»
22 4	Alvíss qvaþ: «Logn heitir meþ monnom, enn logi meþ goðom, kalla vindslot vanir, ofhlý iotnar, alfar dagseva, kalla dvergar dags vero.»
23 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve sa marr heitir, er menn roa, heimi hveriom i?»
24 4	Alvíss qvaþ: «Ser heitir meþ monnom, en silegia meþ goþom, kalla vág vanir, álheim iotnar, alfar lagastaf, kalla dvergar divpan mar.»
25 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve sa eldr heitir, er brenn fyr alda sonom, heimi hveriom i?»
26 4	Alvíss qvaþ: «Eldr heitir meþ monnom, enn meþ asom fvni, kalla vag vanir, frekan iotnar, en forbrenni dvergar, kalla i helio hra/þvþ.»
27 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve sa viþr heitir, er vex fyr alda sonom, heimi hveriom i?»
28 4	Alvíss qvaþ: «Viþr heitir meþ monnom, enn vallar fax meþ goðom, kalla hliþþang halir, elldi iotnar, alfar fagrlima, kalla vond vanir.»
29 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve sv nótt heitir, en Na/rvi kenda, heimi hveriom i?»
30 4	Alvíss qvaþ: «Nott heitir meþ monnom, en niól meþ goðom, kalla grimo ginnregin, oliós iotnar, alfar svefngaman, kalla dvergar dra/mniorvn.»
31 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve þat sáþ heitir, er sá alda synir, heimi hveriom i?»
32 4	Alvíss qvaþ: «Bygg heitir meþ monnom, enn barr meþ goðom, kalla vaxt vanir, eti ia/tnar, alfar lagastaf, kalla i helio hnipinn.»
33 4	Þórr qvaþ: «Segðv mer þat, Alvíss! oll of ra/c fira voromc, dvergr! at vitir: hve þat a/l heitir, er drecca alda synir, heimi hveriom i?»
34 4	Alvíss qvaþ: «Ol heitir meþ monnom, enn meþ asom biórr, kalla veig vanir, hreina la/g ia/tnar, enn i helio mioþ, kalla svmbl Svttvngs synir.»
35 4	Þórr qvaþ: «I eino briosti ec sác aldregi fleiri forna stafi; miclom talom ec qveð teldan þic: vppi ertv, dvergr! vm dagaþr, nv scinn sól i sali.»