Þrymskviða eða Hamarsheimt
1 5	Reiðr var þa Vingþórr, er hann vacnaþi oc sins hamars vm sacnaði; scegg nam at hrista, sca/r nam at dyia, reþ Iarþar bvrr vm at þreifaz.
2 5	Oc hann þat orða allz fyrst vm qvaþ: «Heyrðv nv, Loci! hvat ec nv meli, er eigi veit iarðar hvergi ne vphimins: áss er stolinn hamri».
3 5	Gengo þeir fagra Freyio tvna, oc hann þat orða allz fyrst vm qvaþ: «Mvntv mer, Freyia! fiaþrhams liá, ef ec minn hamar mettac hitta?».
4	Freyia qvaþ: «Þo mvnda ec gefa þer, þott or gvlli veri, oc þo selia at veri or silfri.»
5 3	Flo þa Loci, fiaðrhamr dvnþi, vnz fyr vtan com asa garða oc fyr innan com iotna heima.
6 3	Þrymr sat a ha/gi, þvrsa drottinn, greyiom sinom gvllba/nd snori oc ma/rom sinom ma/n iafnaði.
7 5	Þrymr qvaþ: «Hvat er meþ asom? hvat er meþ alfom? hví ertv einn kominn í iotvnheima?» Loci qvaþ: «Ilt er meþ asom, ilt er meþ alfom; hefir þv Hloriþa hamar vm folginn?»
8 5	Þrymr qvaþ: «Ec hefi Hlorriþa hamar vm folginn átta ra/stom fyr iorþ neþan; hann engi maþr aptr um heimtir, nema fori mer Freyio at qven.»
9 3 7	Fló þa Loci, fiadrhamr dvnþi, vnz fyr vtan com iotna heima oc fyr innan com asa garða; metti hann Þór miðra garða, oc hann þat orda allz fyrst vm qvad:
10 5	«Hefir þv erendi sem erfiði? segðv a lopti long tiþindi: opt sitianda sa/gvr vm fallaz, oc liggiandi lygi vm bellir.»
11 5	Loci qvaþ: «Hefi ec erfidi oc orindi; Þrymr hefir þinn hamar, þvrsa drottinn; hann engi maþr aptr vm heimtir, nema hanom fori Freyio at qván.»
12 5	Ganga þeir fagra Freyio at hitta, oc hann þat orda allz fyrst vm qvað: «Bittv þic, Freyia! brvþar líni, viþ scolom aka tva/ i iotvnheima.»
13 3 7	Reið varð þa Freyia oc fnasaþi, allr ása salr vndir bifðiz, sta/cc þat iþ micla men Brisinga: «Mic veiztv verþa vergiarnasta, ef ec ek meþ þer i iotvnheima.»
14 5	Senn varo esir allir a þingi oc asynior allar a mali, oc vm þat reþo rikir tifar, hve þeir Hloriþa hamar vm setti.
15 5	Þa qvaþ þat Heimdallr, hvitastr ása, — vissi hann vel fram sem vanir aþrir —: «Bindo ver Þor þa brvþar lini, hafi hann iþ micla men Brisinga!
16 5	Latom vnd hanom hrynia lvcla oc kvennvaþir vm kne falla, en a briosti breiþa steína oc hagliga vm ha/fvþ typpom!»
17 3	Þa qvaþ þat Þorr, þrvðugr ass: «Mic mvno esir argan kalla, ef ec bindaz let brvþar líni.»
18 5	Þa qvaþ þat Loci, Lá/feyiar sonr: «Þegi þv, Þorr! þeirra orþa; þegar mvno iotnar asgarð bva, nema þv þinn hamar þer vm heimtir.»
19 5 9	Bvndo þeir Þór þa brvþar líni oc eno micla meni Brisinga, leto vnd hanom hrynia lvcla oc kvennvaþir vm kne falla, enn a briosti breiþa steina, oc hagliga vm ha/fvþ typþo.
20 3	Þa qvaþ Loci, La/feyiar sonr: «Mvn ec oc meþ þer ambót vera, vid scolom aka tver i iotvnheima.»
21 5	Senn varo hafrar heim vm reknir, scyndir at sca/clom, scyldo vel renna; biorg brotnoþo, brann iorþ loga, ók Oþins sonr í iotvnheima.
22 5	Þa qvaþ þat Þrymr, þvrsa drottinn: «Standit vp, iotnar! oc straiþ becci; nv foriþ mer Freyio at qvan, Niarþar dottvr or Noatvnom!
23 5	Ganga her at gardi gvllhyrnþar kýr, oxn alsvartir iotni at gamni; fiolþ a ec meiþma, fiolþ a ec menia, einnar mer Freýio avant þiccir.»
24 5 9	Var þar at qveldi vm comiþ snimma, oc fyr iotna a/l fram borit; einn át oxa, átta laxa, krasir allar þer er konor scyldo, dracc Sifiar verr sáld þriv miaþar.
25 5	Þa qvaþ þat Þrymr, þvrsa drottinn: «Hvar sattv brvþir bíta hvassara? saca ec brvþir bíta breiðara, ne inn meira mioþ mey vm drecca.»
26 5	Sat in alsnotra ambót fyr, er orð vm fann viþ iotvns máli: «Át vetr Freyia átta nottom, sva var hon oþfvs í iotvnheima.»
27 5	Lá/t vnd líno, lysti at cyssa, enn hann vtan sta/cc endlangan sal: «Hvi ero a/ndótt a/go Freyio? þicci mer or a/gvm [eldr of] brenna.»
28 5	Sat in alsnotra ambót fyr, er orð vm fann viþ iotvns máli: «Svaf vetr Freyia átta nottom, sva var hon oþfvs i iotvnheima.»
29 5	Inn com in arma iotna systir, hin er brvþfiár biþia þorði: «Lattv þer af ha/ndom hringa rá/ða, ef þv a/þlaz vill astir minar, astir minar, alla hylli!»
30 5	Þa qvaþ þat Þrymr, þvrsa drottinn: «Beriþ inn hamar brvþi at vígia, leggit Miollni i meyiar kne, vígit ocr saman Várar hendi!»
31 5	Hló Hlorriþa hvgr i briosti, er harðhvgaþr hamar vm þecþi; Þrym drap hann fyrstan, þvrsa drottin, oc ett iotvns alla lamþi.
32 5 9	Drap hann ina a/ldno iotna systvr, hin er brvþfiár of beþit hafði; hon skell vm hlá/t fyr scillinga, enn ha/gg hamars fyr hringa fiolþ. Sva com Oþins sonr endr at hamri.