Vafþrúðnismál
1 4	Oþinn qvaþ: «Raþ þv mer nv, Frigg! allz mic fara tíðir at vitia Vafðrvdnis; forvitni micla qveþ ec mer a fornom sta/fom við þann inn alsvinna iotvn.»
2 4	Frigg qvaþ: «Heima letia ec munda Heriafa/ðr i ga/rðom goða; þviat engi iotvn ec hvgða iafnramman sem Vafðrvðni vera.»
3 4	Oþinn qvaþ: «Fiolþ ec fór, fiolþ ec freistaða, fia/lþ ec reynda regin; hitt vil ec vita, hve Vafðrvþnis salakynni se.»
4 4	Frigg qvaþ: «Heill þv farir! heill þv aptr komir! heill þv a sinnom sér! oþi þer dvgi, hvars þv scalt, Aldafa/þr, orðom mela iotvn!»
5 4	For þa Oðinn at freista orþspeci þess ins alsvinna iotvns; at ha/llo hann com, oc atti † Íms faðir; inn gecc Yggr þegar.
6 4	Oþinn qvaþ: «Heill þv nv, Vafðrvðnir! nv em ec i ha/ll kominn a þic sialfan sia; hitt vil ec fyrst vita, ef þv froþr ser eþa alsviþr iotvnn.»
7 4	Vafþrvðnir qvaþ: «Hvat er þat manna, er i mínom sal verpomc orði á? vt þv ne comir orom ha/llom ofra, nema þv inn snotrari ser.»
8 4	Oþinn qvaþ: «Gagnraþr ec heiti, nv emc af gongo kominn þyrstr til þinna sala, laðar þvrfi — hefi ec lengi farit — oc þinna andfanga, iotvnn!»
9 4	Vafþrvðnir qvaþ: «Hvi þv þa, Gagnraþr, meliz af gólfi fyr? farþv i sess i sal! þa scal freista, hvarr fleira viti, gestr eþa inn gamli þvlr.»
10 4	Oþinn qvaþ: «Oa/þigr maþr, er til a/þigs komr, meli þarft eþa þegi; ofrmelgi micil hygg ec, at illa geti hveím er viþ kaldrifiadan komr.»
11 4	Vafþrvðnir qvaþ: «Segþv mer, Gagnraþr, allz þv a gólfi vill þins vm freista frama: hve sa hestr heitir, er hverian dregr dag of drottma/go?»
12 4	Oþinn qvaþ: «Scinfaxi heitir, er inn scíra dregr dag vm drottma/go; hesta beztr þyccir hann meþ Hreíðgotom, ey lysir ma/n af mari.»
13 4	Vafþrvðnir qvaþ: «Segdv þat, Gagnraþr, allz þv a gólfi vill þins vm freista frama: hve sa iór heitir, er a/stan dregr nott of nyt regin?»
14 4	Oþinn qvaþ: «Hrímfaxi heitir, er hveria dregr nott of nyt regin; meldropa fellir hann morgin hvern, þaðan komr da/gg vm dala.»
15 4	Vafþrvðnir qvaþ: «Segðv þat, Gagnraþr, allz þv a gólfi vill þins vm freista frama: hve sv á heitir, er deilir meþ iotna sonom grvnd oc meþ goðom?»
16 4	Oþinn qvaþ: «Ifing heitir á, er deilir meþ iotna sonom grvnd oc meþ goðom; opin renna hon scal vm aldrdaga, verþrat íss a á.»
17 4	Vafþrvðnir qvaþ: «Segðv þat, Gagnraþr, allz þv a gólfi vill þins vm freista frama: hve sa va/llr heitir, er finnaz vigi at Svrtr oc in svaso goð?»
18 4	Oþinn qvaþ: «Vigriþr heitir vollr, er finnaz vigi at Svrtr oc in svaso goð; hvndraþ rasta hann er a hverian veg, sa er þeim vollr vitaþr.»
19 4	Vafþrvðnir qvaþ: «Froþr ertv nv gestr, far þv a becc iotvns oc melomc i sessi saman! ha/fði veðia við scolom ha/llo i, gestr! vm geðspeki.»
	Capitvlvm.
20 4	Oþinn qvaþ: «Segðv þat iþ eína, ef þitt oþi dvgir oc þv, Vafþrvðnir, vitir: hvaþan iorð vm com eþa vpphiminn fyrst? inn froþi iotvnn!»
21 4	Vafþrvðnir qvaþ: «Ór Ymis holdi var iorð vm sca/pvð, en or beinom biorg, himinn or ha/si ins hrimkalda iotvns, enn or sveita sior.»
22 4	Oþinn qvaþ: «Segðv þat annat, ef þitt eþi dvgir oc þv, Vafþrvðnir, vitir: hvadan máni kom, sa er ferr menn yfir, eþa sol iþ sama?»
23 4	Vafþrvðnir qvaþ: «Mvndilfori heitir, hann er Mána faþir oc sva Solar iþ sama; himin hverfa þa/ scolo hverian dag a/ldom at ártali.»
24 4	Oþinn qvaþ: «Segðv þat iþ þriþia, allz þic svinnan qveþa oc þv, Vafþrvðnir, vitir: hvaðan dagr vm com, sa er ferr drot yfir, eþa nott meþ niðom?»
25 4	Vafþrvðnir qvaþ: «Dellingr heitir, hann er Dags faþir, enn Nott var Na/rvi borin; ny oc niþ scopo nyt regin a/ldom at artali.»
26 4	Oþinn qvaþ: «Segðv þat iþ fiorþa, allz þic froþan qveþa, oc þv, Vafþrvðnir, vitir: hvaðan vetr vm com eþa varmt svmar fyrst meþ froþ regin?»
27 4	Vafþrvðnir qvaþ: «Vindsvalr heitir, hann er Vetrar faþir, enn Svasvþr Svmars; .   .   .   .   .   .   . .   .   .   .   .   .   . .   .   .   .   .   .   .   .»
28 4	Oþinn qvaþ: «Segdv þat iþ fimta, allz þic froþan qveþa, oc þv, Vafþrvðnir, vitir: hverr † asa ellztr eþa Ymis niðia yrþi i ardaga?»
29 4	Vafþrvðnir qvaþ: «Orófi vetra, aþr veri iorþ vm scopvþ, þa var Bergelmir borinn; Þrvdgelmir var þess faðir, enn Avrgelmir afi.»
30 4	Oþinn qvaþ: «Segðv þat it setta, allz þic svinnan qveþa, oc þv, Vafþrvðnir, vitir: hvaþan Avrgelmir com meþ iotna sonom fyrst? inn froþi iotvnn!»
31 4	Vafþrvðnir qvaþ: «Or Elivagom stvcco eítrdropar, sva óx, vnnz or varð iotvnn; þar ero órar ettir komnar allar saman, því er þat e allt til atalt.»
32 4	Oþinn qvaþ: «Segðv þat iþ siaunda, allz þic svinnan qveþa, oc þv, Vafþrvðnir, vitir: hve sa born gat enn balldni iotvnn, er hann hafdit gygiar gaman?»
33 4	Vafþrvðnir qvaþ: «Vndir hendi vaxa qvaþo hrímþvrsi mey oc ma/g saman; fótr við foti gat ins froða iotvns sexha/fðaþan son.»
34 4	Oþinn qvaþ: «Segðv þat iþ átta, allz þic froþan qveþa, oc þv, Vafþrvðnir, vitir: hvat þv fyrst vm mant eþa fremst vm veitzt? þv ert alsviþr, iotvnn.»
35 4	Vafþrvðnir qvaþ: «Orófi vetra, aþr veri iorð vm ska/pvð, þa var Bergelmir borinn: þat ec fyrst vm man, er sa inn froþi iotvnn a var lvðr vm lagiðr.»
36 4	Oþinn qvaþ: «Segðv þat iþ níunda, allz þic svinnan qveþa, oc þv, Vafþrvðnir, vitir: hvadan vindr vm komr, sva at ferr vág yfir? e menn hann sialfan vm siá.»
37 4	Vafþrvðnir qvaþ: «Hresvelgr heitir, er sitr a himins enda, iotvnn i arnar ham; af hans vengiom qveþa vind koma alla menn yfir.»
38 4	Oþinn qvaþ: «Segðv þat iþ tíunda, allz þu tiva ra/c a/ll, Vafðrvðnir, vitir: hvaðan Niorðr vm kom † meþ asa sonom? — hofom oc ha/rgom hann reðr hvnnmorgom — oc varþaþ hann asom alinn.»
39 4	Vafþrvðnir qvaþ: «I vanaheimi scopo hann vis regin, oc seldo at gislingo goðvm; i aldar ra/c hann mvn aptr coma heim meþ visom va/nom.»
40 4	Oþinn qvaþ: «Segðv þat et ellipta: hvar ytar tvnom i ha/ggvaz hverian dag? val þeir kiosa oc riþa vígi fra, sitia meirr vm sáttir saman.»
41 4	Vafþrvðnir qvaþ: «Allir einheriar Oðins tvnom i ha/ggvaz hverian dag; val þeir kiosa oc riþa vígi fra, sitia meirr vm sáttir saman.»
42 4	Oþinn qvaþ: «Segþv þat iþ tolpta, hvi þv tiva ra/c a/ll, Vafðrvðnir, vitir? fra iotna rvnom oc allra goða segir þv iþ sannasta, inn alsvinni iotvnn!»
43 4	Vafþrvðnir qvaþ: «Fra iotna rvnom oc allra goða ec kann segia satt, þviat hvern hefi ec heim vm komit: nio kom ec heima, fyr niflhel neðan, hinig deyia or helio halir.»
44 4	Oþinn qvaþ: «Fiolþ ec for, fiolþ ec freistaþac, fiolþ ec vm reynda regin: hvat lifir manna, þa er inn mera liþr fimbvlvetr meþ firom?»
45 4	Vafþrvðnir qvaþ: «Lif oc Leifþrasir, enn þa/ leynaz mvno i holti Hoddmimis; morginda/ggvar ðav ser at mat hafa, enn þaðan af aldir alaz.»
46 4	Oþinn qvaþ: «Fiolþ ec for, fiolþ ec freistaþac, fiolþ ec vm reynda regin: hvaðan comr sol a inn sletta himin, þa er þessa hefir Fenrir farit?»
47 4	Vafþrvðnir qvaþ: «Eina dottvr berr Alfra/ðvll, aþr hana Fenrir fari; sv scal riða, þa er regin deyia, modvr bra/tir mer.»
48 4	Oþinn qvaþ: «Fiolþ ec for, fiolþ ec freistaþac, fiolþ ec vm reynda regin: Hveriar ’ro þer meyiar, er liþa mar yfir, frodgediaþar fara?»
49 4	Vafþrvðnir qvaþ: «Þriar þioðár falla þorp yfir meyia Ma/gþrasiss; hamingior einar þer er i heimi ero, þo þer meþ iotnom alaz.»
50 4	Oþinn qvaþ: «Fiolþ ec for, fiolþ ec freistaþac, fiolþ ec vm reynda regin: Hverir raþa esir eignom goða, þa er slocnar Svrta logi?»
51 4	Vafþrvðnir qvaþ: «Viþarr oc Vali byggia vé goða, þa er slocnar Svrta logi; Móþi oc Magni scolo Miollni hafa Vingnis at vigþroti.»
52 4	Oþinn qvaþ: «Fiolþ ec for, fiolþ ec freistaþac, fiolþ ec vm reynda regin: hvat verþr Oðni at aldrlagi, þa er vm rivfaz regin?»
53 4	Vafþrvðnir qvaþ: «Vlfr gleypa mvn Aldafa/þr, þess mvn Viþarr reca; kalda kiapta hann klyfia mvn vitnis vigi at.»
54 4	Oþinn qvaþ: «Fiolþ ec for, fiolþ ec freistaþac, fiolþ ec vm reynda regin: hvat melti Oðinn, aþr a bal stigi, sialfr i eyra syni?»
55 4 7	Vafþrvðnir qvaþ: «Ey manne þat veit, hvat þv i ardaga sagdir i eyra syni; feigom mvnni melta ec mina forna stafi oc vm ragnara/c. Nv ec viþ Oðin deildac mina orþspeci, þv ert e visastr vera.»